Cométe sarea | 1941-1944
El camino de la libertad (Florentino Goikoetxea y otros hernaniarras...)
Juan Carlos Jiménez de Aberasturi
Hernaniko Udala, 2006
Hegazkinlariak
erori ziren tokitik jaso; inguruan ezkutatu; zaindu; osatu; Estatu
frantsesa, orduan alemaniarren kontrolpean zegoena, goitik behera
ezkutuan zeharkatu; Euskal Herrira ekarri; Bidasoa ibaia gauez igaro eta
Gibraltarren barrena berriro Britainia Handira itzultzen zituzten. Hori
zen Comète Sareak behin eta berriro egin zuen lana.
Hegazkinlari britainiarrak ez ezik, aliatuen aldeko espioitza lanak egiten zituztenak edo Erresistentzia
frantsesean aritzen zirenak ere bazeuden.
Comète sarearen lehen haria Belgikan ehundu zuen Andrée de Jongh izeneko emakume ausartak. Comète sarearen historia belgikar neska gazte honek Gurutze Gorrian izena eman zuenean hasten da. Han ezagutu zuen Arnold Deppé ingeniaria eta han ezagutu zuen erresistentzia giroa.
Deppék ezagun anitz zituen Euskal Herrian, Donibane Lohitzunen zineko
soinu teknikari aritu baitzen urte luzez. Horien bitartez Andrée
Alejandro Elizalde mugalariarekin eta jatorriz belgikar zen De Greff
izeneko familiarekin harremanetan jarri zen. Familia hori Angelura
iritsi zen nazien bultzadatik ihesi
Eta Voisin izeneko etxean bizi zen.
1941eko uztailean Dédée izenarekin ezagutzen zuten Comète sarearen
sortzailea Baionara iritsi zen. Hainbat iheslariekin batera lehenengo
aldiz pasa zuen Bidasoako muga Tomas Anabitarte mugalari
hernaniarrak gidatuta.
Euskal Herrian geldialdia
Hegazkin-gidariek Mendebaldeko Europa erdian zehar egiten zuten ihesaldi horretan Euskal Herriak ere izan zuen zeresanik. Lapurdin, Baiona, Angelu, Ziburu edo Urruña, eta Gipuzkoan, Irun, Oiartzun, Errenteria, Hernani eta Donostia herriak zeuden bere ibilbidean.
Britainia Handiko Gobernuak Bilbon zuen kontsulatuak ere ihesaldi horietan laguntzen zuen.
Euskal herritarrek ere parte hartu zuten nazien ihesean zetozenak
babesten. Florentino Goikoetxea Hernanin jaio eta Lapurdin errefuxiatu
zen mugalaria, Kattalin Agirre, Urruñako Bidegain Berri baserriko
Frantxia Usandizaga, Hernaniko Osiñaga auzoko Otsuene Haundiko Tomas
Anabitarte, Juan
Manuel Larburu eta Martin Errazkin dira horietako batzuk.
* Iturria: kazeta.info
Florentino Goikoetxea mugalaria, pantaila handira.
Florentino Goikoetxea Comète Sarean laguntzen aritu zen mugalaririk ezagunetakoa da, hernaniarra, Altzueta baserrikoa.
Beste bi hernaniarrek, Iurre Telleria eta Enara Goikoetxeak,
Florentinoren pasarteetatik abiatuta Comète Sareari buruzko
pelikula-dokumentala egin dute: "Azken Bidaia".
Dokumentalaren soinu
banda Joxan Goikoetxea musikariak egin du. Joxan Florentinoren senidea
da, bere aitona eta Florentino anaiak ziren.
Dokumentala, Espainia, Frantzia eta Belgikaren arteko koproduzioa izan da.
Sei urteko lanaren ostean, 2011ko Donostiako Zinemaldian estreinatu
zen dokumentala. Azaroan, Donostia, Bilbo, Gasteiz, Bartzelona eta
Madrilen estreinatu zen, eta Hernanin abenduaren 16an aurkeztu zen.
Estatutik kanpo ere aurkeztu dute dokumentala, Frantzian eta Belgikan, esaterako.