—bertsolariak—
ARNAITZ LASARTE SANTA KRUZ
1989an jaioa, Ereñozun
Argazkia: Estitxu Eizagirre
Hernaniko Ereñozu auzoko bizilaguna da, Larre-Gain sagardotegiko semea. Lehen plaza: Hernanin, 2002ko maiatzean, Hernaniko kultur etxean, Eskolarteko Txapelketan. Unai Gaztelumendi, Jon Hidalgo eta Ane Lujanbiorekin.
[Bertsolaritzaren datu-basea / Bertsozale Elkartea]
ETXEKO GIROA
Bertsolari inor ez, baina denak dira zaleak, aita, aitona, ama... Hitzetik Hortzera igandero ikusi, bertsoak entzun... Giro horretakoak, saio batera eta bestera joaten direnak. Aitonak (Pedro Santa Kruz) bertso pila dakizki baina etxean oso gutxi entzun dizkiogu. Aita bai, kotxean beti aritu zaigu bertsotan. Eta bi arrebak ez dira inoiz plazara atera, baina nik adina egiten dute bertsotan.
EREÑOZUKO ESKOLAN
Laugarren mailan ginenean, 9 urterekin, euskarako ordutan bertsolaritza ematen hasi zen Aritz Zerain. Aritzekin urtebete egin eta hurrengo urtean txandaka etortzen ziren Aritz eta Ibon Miner, eta astean ordubete edukitzen genuen bertsoak egin, entzun eta kantatzeko. Han hiru urtean ibili eta gero Hernanira Langile ikastolara etorri nintzenean, orduan apuntatu ginen bertso eskolan, 12 urterekin, Amaia Otxotorena eta biak, Ibon eta Aritzen bidez.
Joxe Anjel Aranbururekin hasi nintzen eta geroztik Itziar eta Estitxu bixkiekin. Nahiko goiz hasi ginen gure kabuz biltzen, 15 urterekin edo, Biteri ondoko lokalean, asteartetan.
ESKOLARTEKO TXAPELKETAK
|
Gipuzkoako Eskolarteko Bertsolari Txapelketa |
2002 |
finalista (txikitan, hernani taldean) |
|
Gipuzkoako Eskolarteko Bertsolari Txapelketa |
2003 |
finalista (txikitan, hernani taldean) |
|
Gipuzkoako Eskolarteko Bertsolari Txapelketa |
2006 |
finalista (handitan) |
|
Gipuzkoako Eskolarteko Bertsolari Txapelketa |
2007 |
finalista (handitan) |
Oroimen onak dauzkat. Hasieran ez genion inportantziarik ematen.
SARIKETAK
Dena urte berean izan zen, 2007an: Eskolarteko Txapelketan gustura aritu, Erniarraitzen finalera iritsi, Tabernetako Txapelketa irabazi eta Gipuzkoako Txapelketan parte hartu nuen. Nire urte onena izan zen.
Erniarraitzen seigarren egin nuen baina hala ere txoratzen geratu nintzen. Azpeitiko gaztetxean izan zen finala, topera eta kristoren giroa zegoen. Bilbon ikasten hasi berri nintzen eta ostegunetan Santutxuko bertso eskolara joaten nintzen Unai Gaztelumendirekin. Hernanin biltzen ginen ostiraletan eta 2007ko Gipuzkoako Txapelketako entrenamendua ere nabaritu zen.
Tabernetako Txapelketan ez nintzen kantatzekoa, eta azken momentuan esan zidaten Inhar Olanok ezin zuela. Gustuen geratu naizen saioa hori izan zen. Jende aurrean txarra naiz, gaizki pasatzen dut, baina orduan oso ondo pasa nuen eta erraz egin nuen bertsotan. Txapelak ilusioa egin zidan. Gaztea nintzen oso, oraindik ez nuen alkoholik edaten. Urte hartan kanporaketak egin ziren Kide tabernako goiko partean, eta hiru lehengusu pasa ginen finalera: Arkaitz Santa Kruz, Iraitz Santa Kruz eta ni. Ofizioka biekin egitea tokatu zitzaidan, eta oso gustura aritu nintzen. Buruz burukoa Iraitzekin jokatu nuen. Ez naiz jario handikoa izan baina gau hartan etorri zitzaidan!
Lizardin ere bi aldiz hartu dut parte.
PLAZAK
Bertsoa gustatzen zait baina ez dakit jende-aurrea den, nagia den... ez dut nire burua batean eta bestean ikusten. Bertso eskolan kantatu eta gero komentatzea gustatzen zait, saltsa hori.
Osinagan, adibidez, gustura kantatzen dugu. Lehen aldiz Iker Osa eta Jon Iraolarekin joan ginen, 14-15 urterekin. Gero guk bakarrik jarraitu genuen eta orain Eli Pagola eta Eñaut Martikorena hasi dira. Portun, Santa Barbaran eta Ugaldetxon ere kantatu izan dut.
Niretzat grazia handia duena San Joanetako txupinazoa da, 2006tik 2012ra kantatu dugu Oier Iurramendik eta biok festei hasiera emanez. Omenaldietan ere dexentetan kantatu dut. Dantzari Festan, Txalaparta Festan...
2005-2006an Ereñozuko Aste Kulturalean kantatu genuen Aritz Zerain, Ibon Miner, Unai Agirre, Iñaki Zelaia eta nik.
2012an jaialdi batean gai jartzaile aritu nintzen. Auziperatuta zeuden 10 gazteren epaiketarako dirua biltzeko saio bat antolatu zen Hernaniko frontoian, eta bertsoak azken aldian eman didan satisfazio handienetakoa izan zen. Frontoia goraino bete zen osteguna izanda, saio oso ona atera zela esango nuke... Hunkigarri xamarra izan zen.
TXAPELKETAK
|
Gipuzkoako Bertsolari Txapelketa |
2007 |
Lehen fasea |
|
Gipuzkoako Bertsolari Txapelketa |
2011 |
Lehen fasea |
2007KO GIPUZKOAKO TXAPELKETA
Kolpe dexentekoa hartu nuen. Ez fasez pasatzeko esperantza nuelako. Baizik eta, jendeak nirekin sufritu egin zuelako. Hernaniko saioan abestea tokatu zitzaidan: Unai Agirre, Joxe Luis Urdangarin, Manex Mujika, Uxue Alberdi eta Gorka Etxeberriarekin. Biteri aretoa lepo zegoen: familia, kuadrillla, ezagun asko, eta orduan pasatako urduritasunak ez ditut sekula pasa. Lehen bertsotik urduritasuna transmititu nuen. Zortziko handian nahiko txukun ibili nintzela esango nuke, baina zortxiko txikian hasi ziren arazoak... Uxue Alberdirekin kantatu nuen, eta bertso bat ere ez nuen osatu pare bat aldiz geratu gabe....
Iturria: XDZ
2011 GIPUZKOAKO TXAPELKETA
Lehen fasean bi saio izan ziren. Nik Orion eta Gabirin kantatu nuen. Oriokoan gustora geratu nintzen. Bakarka kaka egin nuen, ordea. Eta saio txarrak ez dira erraz ahazten... Gabirin ere ale politak bota nituela uste dut baina irregular, beti bezala. Hala ere, balorazio positiboa egiten dut txapelketaz.
Gipuzkoako Txapelketa, 2007-09-23 Hernani
Kartzelako gaia: Tren geltokian zaude trena noiz iritsiko zain.
Arnaitz Lasarte:
Goizean jeiki ta ondo jantzi
hori da dedan diztira;
korbata txukun, galtza berriak
mutiko onen neurrira;
tren geltokira iritsia naiz
begiratu urrutira;
bakar-bakarrik nago oraindik
hara ta hona begira...
Zai zaudenean tren azkar denak
moteldu egiten dira.
Orain artean kobarde samar
ta egin behar aproba;
zulo beltzean sartua nago
ta irten nahi nuke gora;
hain ondo jantzi hain guapo egon
ta nago oso gustora;
lasai antzean jarraitu nahi det
nahiz ta pasa den denbora
pazientzia hartu ezkero
nahi dedana helduko da.
Azkenerako iritsi da ta
hau soinuak trenarenak!
Neska eder bat jaitsi da noizbait
ahaztu dira nere penak;
hau ondo daki itxarotea
zer den probatu duenak;
hain dago polit, hain da ederra
ditu jantzirik onenak...
Denbora askoz zain egon arren
merezi izan du denak.