—bertsolariak—
AGIN LABURU REZOLA
1985ean jaioa, Astigarragan
Rezola eta Ipintza sagardotegietako semea izanik, bertan aritzen da parrillero. Kazetaritza egin du, eta, besteak beste, Hernaniko kronikan, Euskadi Irratian, Gaztesarean eta Info7n aritu da lanean. Hamaika Bertute ekimeneko kide izana. Lehen plaza: Hernanin, 2000n, Biteri Kultur Etxean, Bertso-Latako haurren saioan.
[Bertsolaritzaren datu basea / Bertsozale Elkartea]
ETXEKO GIROA
Igandetan aitaren gurasoen etxera joaten ginen, eta Astigarragatik Oiartzuna bidean beti bertsotan joaten ginen eta bueltan ere bai. Familiako bazkaritan beti aitona, aita eta hiruok aritzen ginen. Aitona Urnietakoa nuen, Xoxokakoa, gero Lezon eta azkena Oiartzunen bizi zena.
Ikasi nituen lehen bertsoak Lasarterenak ziren, aitona eta aita haren zaleak zirelako. Umetan bertsotan lardaskan egiten nuen, eta klasean beti esaten zidaten “Agin, kantatu bertso bat!”. Eskurtsiora joaten ginen bakoitzean, edo kurtso bukaeretan irakasleei kantatzea tokatzen zitzaidan... halakoetan aitak idatzitako bertsoak kantatzen nituen.
MARTUTENEKO IKASTOLATIK
HERNANIKO BERTSO ESKOLARA
Joxe Luis Urdangarinekin hasi ginen ikastolan bertan bertsoa lantzen, eskola orduz kanpo. Hura bukatu genuen, eta egia esan, orduan ez nion zentzu askorik bilatzen bertso eskolan hasteari, etxean eta familian beti aritu garelako bertsotan. Amak konbentzituta apuntatu nintzen Hernanin. Gogoan daukat lehenengo urtean Jon Eizmendirekin ibili ginela baina hurrengo urterako utzi egin nuela. Gero berriz hasi nintzen Joxe Anjel Aranbururen taldean, Aitor Mendiluze irakasle genuela. 14 urte izango nituen.
Lehenengo urtean Aitor Mendiluze izan genuen irakasle, eta urte bukaeratik aurrera Gorka Tolosa. Eta hurrengo urtean Iker Osa.
ESKOLARTEKO TXAPELKETAK
|
Euskal Herriko Eskolarteko Txapelketa |
2001 |
Finalista |
|
Gipuzkoako Eskolarteko Txapelketa |
2000 |
Parte-hartzaile |
|
Gipuzkoako Eskolarteko Txapelketa |
2001 |
Txapelduna |
|
Gipuzkoako Eskolarteko Txapelketa |
2002 |
Finalista |
|
Gipuzkoako Eskolarteko Txapelketa |
2003 |
Parte-hartzaile |
SARIKETAK
|
Hernandorena |
2005 |
Parte-hartzaile |
|
Lizardi Saria |
2004 |
Finalista |
|
Lizardi Saria |
2005 |
Finalista |
|
Lizardi Saria |
2006 |
Txapeldun ordea |
|
Osinalde |
2005 |
Finalista |
|
Plazatik Gaztetxera |
2007 |
Txapelduna |
LEHEN SAIOAK
Hasiera haietan, saio denak librekoak ziren: poteo tipora, plazan Astigarragan herri kirolak ziren bitartean, Santio Mendin Ama Birjinetakoa egiten dugula ere urte batzuk badira...
TXAPELKETAK
|
Gipuzkoako Bertsolari Txapelketa |
2003 |
Bigarren fasea |
|
Gipuzkoako Bertsolari Txapelketa |
2007 |
Azken laurdenak |
|
Gipuzkoako Bertsolari Txapelketa |
2011 |
Finalista |
|
Euskal Herriko Bertsolari Txapelketa |
2013 |
Final-erdiak |
2003KO GIPUZKOAKO TXAPELKETA
Gipuzkoako Txapelketako entrenamenduak mugarri izan ziren niretzat. 2003an, sozidadetan biltzen hasi ginenean. Txapelketa hura Ereñozuko eskolako goialde hartan preparatu genuen, bai Joxe Anjel Aranburuk eta bai nik, han biltzen zen taldearekin.
Oihartzunen kantatu nuen eta aurrera egin nuen.
Urte hartan, 18 urterekin, Eskolarteko Txapelketako bost bertsotatik Gipuzkoako 14 bertsora pasatzea tokatu zitzaidan, ez nuen sariketek ematen duten ibilbide hori egiteko tarterik izan. Saltoa ikaragarri handia sumatu nuen. Niretzako txapelketa hura beste mundu bat zen. Bertsotan mugarria izan zen, txipa aldatu arazi zidan.
2007KO GIPUZKOAKO TXAPELKETA
Ez dut aldaketa handirik sentitu. Nik uste bertsotan baino gehiago pertsona moduan heldu naizela. Etxetik kanpo Bilbon bizi izanak bastante zaildu nauela uste dut. Mundu hau zer den gehiago ikasi dudala lau urte hauetan.
2001ean, Antonio Camposen eskutik jasotako Eskolarteko txapela buruan.
PLAZETAN
Hernanin saio potolotan bi aldiz kantatu dut, bat San Joanetan plazan eta beste behin Bertso-Latan Biterin.
Lehenengo saio potoloenetako bat Santio Mendin egingo nuen, Maialen Lujanbio eta Imanol Lazkanorekin. Eskolarteko Txapela irabazi eta hurrengo urtean. Harrezkero urtero kantatzen dut Santio Mendin.
Astigarragan saioren bat denean normalean nirekin akordatzen dira. Suertez, nik aukeratzen nuen San Roketan Astigarragan zeinekin kantatu. Gustuko askorekin orduan kantatzeko aukera izan dut.
Beste saio potolo bat Aranoko Santio festetan egin nuen, Maialen Lujanbio, Andoni Egaña eta Unai Iturriagarekin. Unai Elizasu zen gai jartzen.
Ereñozun ere kantatu genuen Maialen Lujanbio, Amets Arzallus, Joxe Lizaso, Julen Zelaieta, Jokin Uranga eta nik. Gai-jartzen Aritz Zerain aritu zen.
TABLADOAN
Igo aurretik beti dut kezka eta ongi egin nahia. Gaizki eginaren sentsazioarekin jaisten banaiz, etxera umore txarrean itzultzen naiz, baita lau katurentzat aritu banaiz ere. Kontzentratzea gehiago kostatzen zait mahaian. Bertsoa hasi eta buka kontzentratuago botatzen dut mikrofonoan, zutik. Horretara ohitu gara.
BERTSOPAPER LEHIAKETAK
|
Koldo Mitxelena Literatur Sariketa |
2000 |
1. saria |
|
Koldo Mitxelena Literatur Sariketa |
2001 |
1. saria |
2006-12-30 Hernani, jaialdia
Jokin Sorozabal senarra eta Agin Laburu emaztea zarete. Biok taberna batean sartu zarete. Tragoa eskatu eta berehala senarra makina txanponjalera hurbildu da emaztea bakarrik utzita. Emazteak barran kafesnea edan du, eta senarrarengana hurbildu da goxo antzera.
A. Laburu:
Nere kafesne bat hartu det ta
zuk berriz zure tragoa
ta igandero bezela zoaz
makina horren ondoa;
adizu Jokin badet zurekin
hitz egiteko gogoa:
nere ahotsa ez al da klink-klink
hoi baino goxoagoa?
J. Sorozobal:
Arrazoi dezu zure ahotsa
polita da gehienian
baina makinan jokatzen det nik
tabernan nabilenian;
suerterik bada honek’e klink-klink
egiten du azkenian
zuri ahotsa aldatzen zaizu
hoi entzuten dezunian.
A. Laburu:
Ene senarrak hola hitz egin
behar al dit alafede!
Txanponen joku horretan nahiz ta
ibili ohi zeran trebe
zure ahotsa ene maitia
sarri ez det egiten nere;
ez dakit inoiz zure ahotsa
aldatzen ote dan ere.
J. Sorozobal:
Nere ahotsa berdina omen da
eskasa edo ustela...
dudik ez dago bere onenak
aspaldi eman zituela.
Bakoitzak bere diruarekin
bete behar du papela
eta neurea gastatu nahi det
nik nahiko nukeen bezela.
A. Laburu:
Zuri dirua zuk gastatzea
lasai edota urduri
inportik ez dit nahiz ta ardoa
alkandoratik isuri;
baino afaria diru horrekin
prestatutzekotan zuri
afaldu behar dira hiru limoi
edota hiru marrubi.
J. Sorozobal:
Oraingo hontan izurratu dit
gaur iluntzerako plana;
hain zuzen hori ez da izango
neure buruan neukana.
Zenbaitek badu loteriakin
suerte hartzeko afana;
azken batean Estatuari
ematen diogu dana.
A. Laburu:
Hogeita hamar urte ezkondu
hogeita beatzi aldrebes...
Zure izaera kanbiatzia
kostatu behar zait nekez.
Estatuari dirua eman
omen diot nik’e errez;
zuk’e norbaiti emango zenion
andreari behinipin ez.
J. Sorozobal:
Estaduari dena emateak
neri ematen dit mina
ta ikusten det zeure aldetik
nola dagoen ezina;
hila joan eta hila etorri
kartera gordin-gordina...
nahiago nuke diruagatik
hasarretuko bagina.