—gaiak—
1980KO TXAPELKETA
1
Milla bederatzireun,
euskaldun laguna,
larogeigarrena da
asi deguna
Urtarrillaren seia,
Errege Eguna,
Donostia’ko Balda’n
bai giro leguna;
baratz euskalduna,
ura osasuna!
Bertsozko jarduna,
nor zan txapelduna?
Amuriza Xabier
irabaztuna.
2
Balda inguru artan
nork zedukan otzik?
Etzegon ekaitzikan,
etzan izotzik.
Guztiok senideak,
iñor ez arrotzik,
euskera barra-barra
eta danok pozik;
burrukatu zortzik
ta ez izan lotsik,
bat ezpaizan motzik
ba-zan antxe itzik!
Su artu etzuanak
ez du biotzik.
3
Arrasate’n jarriak
egosten eltzean,
ta Gernika’n jarraitu
ain su beltzean.
Auetatik erdiak
Donosti’n biltzean,
zenbat arrazoi sakon
zintzilik iltzean;
gaiari eltzean
lurriña pertzean,
usaia ertzean,
mamia ortzean,
ai, zeru ura banu,
launa, iltzean!
4
Danak lepo egiñak
ainbat exerleku,
eta zutik ere bai
zenbaitxo leku.
Iriondo’ren mende
artu zuten esku,
bat oillar baldin bazan
bestea zan kuku;
emendikan ku-ku,
andik kukurruku,
aingeruen zuku,
edertasun zaku,
txapela zeiñi jarri
nork egin juzku?
5
Amaika bertsozale
ta euskaldun tinko,
igandean bildu zan
or nerekiko.
“Kaixo Joxe Manuel!
Zer moduz, Periko?
Esku ori luza zak,
lagun aspaldiko”
Aiton da mutiko,
ta zenbat sasoiko.
“Eskerrak, Jaungoiko,
nion belauniko.
Euskerarik oraindik
etzaiguk ilko!
6
Amuriza txapeldun,
Enbeita bigarren,
beste sei bertsolari
jatorrak urren;
konturatu gaitezen
al danik azkarren,
orrelako jai batek
zenbat on dakarren;
naiz ta sarri erren
guk ikusi arren
gazte eta zarren
kanpo eta barren,
igandean euskera
genduan aurren.
[Joxe Mari Arrieta,
El Diario Vascon argitaratua (1980-1-16 eta 17).
Nere ondar alea, Auspoa 162]