—gaiak—
2010EKO HAMARKADAN (2012 arte)
— Jexux Mari Irazu (15 sorta)
— Unai Agirre (2)
— Agin Laburu (3)
— Beñat Gaztelumendi (2)
HERNANIKO BERTSOLARITZARI JARRIAK
I
Hazi, sabel ta emagin (Bis)
sortu ta sortzen eragin
aho ahoz eskuz esku
bertsolaritza Hernanin.
Hazi, sabel ta emagin
bertsolaritza Hernanin.
II
Olegarioren plazerra (BisJ
zaldi ta karro ederra.
Gauregun kotxea baina
Txirritak bere txoferra.
Olegarioren plazerra
Txirritak bere txoferra.
III
Urumeatik barrena (Bis)
zer da urak dakarrena?
etxero bertsolariak,
bertsolaritzan edena.
Urumeatik barrena
bertsolaritzan edena.
IV
Paulo Txikiaren bira (Bis)
ordu txikitako jira.
Bertsotatik bizikletaz
Arizkundik Hernanira.
Paulo Txikiaren bira
Arizkundik Hernanira.
V
Tturko, Garin ta Aterpe (bis)
Patxi Odriozola fuerte,
bertsoaren surik ez zen
garai gogorren aterpe.
Tturko, Garin ta Aterpe
garai gogorren aterpe.
VI
Gaurkoa omen da moda (bis)
Amurizan kurtsillora
bi hilabetez joan ziren
ehun lagunetikan gora.
Gaurkoa omen da moda
ehun lagunetikan gora.
VII
Ikastaroa zimendu (Bis)
ondoren bidea sendu,
bizarrak zuritu dira
suak gorri jarraitzen du.
Ikastaroa zimendu
suak gorri jarraitzen du.
VIII
Langilen ta Urumean (Bis)
bertsoa ikasgunean
indarrak bildu zituzten
gehien behar zen unean.
Langilen ta Urumean
gehien behar zen unean.
IX
Zenbat tanta olatuak (Bis)
norberera moldatuak.
Joan-etorrian iturri
batetik abiatuak.
Zenbat tanta olatuak
batetik abiatuak.
X
Lanak bere herentzia (Bis)
emana eta utzia:
Bi txapel ta buru asko
hor dago diferentzia.
Lanak bere herentzia
hor dago diferentzia.
[Jexux Mari Irazu, Argia 2.216. alea, 2010-01-31]
* * *
DUKAN DIETARI JARRIAK
Doinua: Iparragirre abila dela.
I
“Flakatu ein haiz” eta antzeko
ez dakit zenbat lausengu
entzun nahiean ibiltzen gera
kiluak kendu ta kendu.
Dieta baten truke
askok egiten dute
burua haizez gizendu,
mende hontako jainko berriak
Dukan izena omen du.
II
Gari artian gosiak egon
biharrekua da hau (e)re:
baxoerdi bat, pastel txiki bat...
zenbat tentazio daude?
Nahiz ta saldu elkarri
eta askotan jarri
dietik onenaren pare,
nere bizitza ez det ulertzen
pekatu txikirik gabe.
III
Lehendabiziko hiru edo bost
egun proteina hutsekin,
fase gehiago ere badaude
baino ezin da hutsegin.
Zenbait mutil ta neska
sumatu det galdezka
“honek zer dik” ta “hark zer din?”
Goserik ez da pasako baino
inbiria berdin-berdin.
IV
Gozo muttur bat ezin probatu
eta alkohol lehortia,
maiz osasuntsu egon asmotan
galdu daiteke nortia.
Legatza eta xerra
janaz ez da ederra
kiluak ezin botia,
baino seguru algaude zer dan
osasuntsu egotia?
V
Batzuen auto-sakrifizio
bestien autoengaino,
Dukanek argi ikusten duna
Aginentzat dago laino,
oreka baita giltza
ta gu bila gabiltza:
noiz arte eta noraino?
Nahiago ditut sei kilo sobran
bizi poza faltan baino.
VI
Suposizioz hitz egiten det
ez naiz eta medikua,
baino ikusi deten apurra
ez det izan begikua.
Nere dieta ordia
ez da askoz hobia,
izan arren betikua:
merkuriodun arraia eta
tomate transgenikua.
[Agin Laburu, Argia 2.295. alea, 2011-10-23]
* * *
2012ko irailean, iritzi sailaren barruan, hiru bertsoko zutabera pasatu zen lehenago sei bertsoko sorta zena. Gaurkotasunari estuago lotzeko asmoz, bertso gutxiago baina landuagoak izan zitezen, eta jende gehiagok idatz zezan.
[Estitxu Eizagirre]
* * *
TALIBANAK
Doinua: Aita izena.
Izan Gobernu, izan Kongresu,
Udal zein Foru Aldundi
baldin botere gunea bada
gizartearen irudi
gure mintzoak nor ipintzen du
prentsaurrekotan urduri?
Hizkuntzak berez omen ditugu
pertsonen arteko zubi
baina gurea amildegi bat
bihurtu dela dirudi.
Hitz ematetik hitz egitera
galtzen den konpromezuak
ageriago utzi ohi ditu
gugan dauden konplexuak
inkestek sortu arren etsipen,
kezka, min eta kexuak
belaunalditan iraungo badu
gure arbasoen sua
euskaraz izan beharko dute
edukiak zein mezuak.
Nahiz talibanak edo naziak
esaka ari zaizkigun
hemen euskaraz dakigun denok
garelako elebidun
gure harrizko herria hain da
burugogor, mingain-bigun...
Euskara gugan dagoelako
ez PPn eta ez Bildun
ea hurrengo Lehendakariak
nola hitz egiten digun.
[Beñat Gaztelumendi, Argia 2.342. alea 2012-10-28]